Berdaq nomidagi Qoraqalpoq davlat akademik musiqali teatrida O‘zbekiston Respublikasi Konstitutsiyasi kuni munosabati bilan bayram tantanasi bo‘lib o‘tdi.

Dastlab O‘zbekiston va Qoraqalpog‘iston Respublikalarining davlat madhiyalari yangradi.

Tadbirda Qoraqalpog‘iston Respublikasi Jo‘qorg‘i Kengesi raisi Amanbay Orinbayev barchani bayram bilan samimiy qutlab, Bosh qomusimiz xalqimiz farovonligining muhim huquqiy asosi ekanligini ta’kidladi. Konstitutsiyamiz yaratib bergan imkoniyatlar asosida xalqimiz ertangi farovon hayot yo‘lida qator yutuqlarga, iqtisodiyotimizning barcha sohalarida ijobiy natijalarga erishayotgani aytib o‘tildi. 

Qayd etilganidek, o‘tgan qisqa davr mobaynida faqat Qoraqalpog‘iston uchun 15 ta tarixiy farmon va qaror qabul qilingani xalqimizning farovon hayotini ta’minlashga va barcha sohalarni rivojlantirishga huquqiy zamin yaratmoqda.

Marosimda o‘z kasbiga sadoqati va ijodiy yutuqlari bilan namuna ko‘rsatgan qator zamondoshlarimiz, xalqimizga o‘rnak bo‘layotgan mahallalardagi ko‘cha boshilari (biylar) munosib taqdirlandi.

Shuningdek, yurtimizda Prezidentimiz rahbarligida olib borilayotgan keng ko‘lamli islohotlar, o‘zgarish va yangilanishlarni targ‘ib qilish va ezgu bunyodkorlik ishlarini aholiga yetkazishda hissa qo‘shayotgan Qoraqalpog‘iston teleradiokompaniyasi xodimlarining bir guruhiga davlat mukofotlari, ko‘krak nishonlari, ish jarayonida zarur bo‘ladigan avtomobil va maxsus texnikalar topshirildi.