Bosh prokurorning birinchi o‘rinbosari B.Valiyev rahbarligidagi ishchi guruhi tomonidan Buxoro viloyatida issiqlik manbai va gaz tarmoqlari, shuningdek, elektr stansiyalarining ishlash rejimi tahlillari asosida, aholi xonadonlari va ijtimoiy soha ob’ektlariga elektr, tabiiy gaz va ichimlik suvini yetkazib berish holatining kuz-qish mavsumiga shayligi, energotejamkorlikni ta’minlash ishlari bevosita joyiga chiqqan holda o‘rganildi.

Jumladan, Buxoro shahridagi “Buxoroenergomarkaz” AJda “Markazlashgan issiqlik ta’minotini rekonstruksiya qilish va energiya samaradorligini oshirish” loyihasi doirasida korxonada isitish tizimlari va qozonxonalarning kuz-qish mavsumiga tayyorgarlik holati ko‘zdan kechirildi.  

Ushbu loyiha doirasida Latviyaning “Eco Air” va Qozog‘istonning “Kazenergonaladka” korxonalari 202 ta ko‘p qavatli uy-joylar va 32 ta ijtimoiy soha ob’ektlariga jami 264 dona individual issiqlik punktlari o‘rnatilishi rejalashtirilgan.  

Shuningdek, pudratchi Xitoyning “China IPPR Engineering” kompaniyasi tomonidan 5,5 km bo‘lgan magistral issiqlik tarmoqlarini zamonaviy penopoleuretan qoplamali quvurlarga almashtiriladi. Qozonxona modernizatsiyasi shartnomasi bo‘yicha pudratchi O‘zbekistonning “Spets Polimer Montaj Sanatsiya” va Rossiyaning “VAPOR” kompaniyalari qozonxonada modernizatsiya ishlarini o‘tkazadi.  

O‘rganishda, korxonani yuqori bosimli yangi gaz tarmog‘iga ulash va loyihani amalga oshirish bilan bog‘liq yuzaga kelayotgan muammoli masalalarni tez fursatlarda bartaraf etish yuzasidan mutasaddilarga topshiriqlar berilib, ijrosi alohida nazoratga olindi.