— Izboskan bilan Paxta­obod tumanlarini bog‘lab turuvchi Tentaksoy daryosining ko‘p­rigini sel yuvib ketga­niga 50 yil bo‘ldi, — deydi 72 yoshli Husanboy Orifjonov. — Sobiq ittifoq davrida murojaat qilmagan joyimiz qolmagan. Yana 25 yil idorama-idora yurganmiz. Umidimiz so‘nib bo­rayotganida Prezidentning Xalq qabulxonasiga murojaat qilgandik, holimizdan xabar oladiganlar topila qoldi.

Husanboy Orifjonov Izboskan tumanidagi Anorzor mahallasida yashaydi.

Ko‘prik qurilishi uchun 5 milliard 394 million so‘m mablag‘ ajratildi. Tez kunlarda ikki tumanni o‘zaro bog‘lab turuvchi ko‘prik ta’mirlanib, 50 yillik muammo bartaraf etiladi.

Tillaxon Ahmadjonova Asaka tumanining Xonaqa mahallasida yashaydi. U Xalq qabulxonasiga uy-joyga muhtojligini aytib, murojaat qilgandi. Homiylar ko‘magida qurib berilgan yangi uy Tillaxon uchun haqiqiy baxt oshyoniga aylandi. Shu tumanning Gumbaz, Qoraqiy mahallalarida yashovchi Lobarxon Mirzaeva, Jannatxon Ahmedovaning uyi ta’mirlanib, hamma sharoitlar yaratib berildi. Bu kabi quvonchga yana 20 nafar murojaatchi sherik bo‘ldi.

Qo‘rg‘ontepa tumanidagi “Best tekstilь” to‘qimachilik korxonasining bir guruh ishchilari Xalq qabulxonasiga 2,5 oydan buyon oylik maosh olmayotganligini aytib, murojaat qilishgan edi. 250 nafar ishchining
80 million so‘mlik ish haqi undirib berildi.

Prezidentning Andijon viloyatidagi Xalq qabulxonasiga 2018 yil davomida bu kabi murojaatlardan 25 ming 528 ta kelib tushdi. Ularning 78 foizi qanoatlantirildi. Qolgan qismi hal etish uchun hududiy tashkilotlarga yuborilgan. Ammo guruch kurmaksiz bo‘lmaganidek, bu masalaga ham panja orasidan qarovchilar yo‘q emas. Shu bois mutasaddi idoralarning 115 nafar vakiliga nisbatan chora ko‘rish maqsadida taklif va taqdimnomalar chiqarildi.Oqibatda 12 nafar mutasaddiga nisbatan ma’muriy, 103 nafariga esa intizomiy javobgarlik tayinlandi.

Xalq ichiga kirib borish, kamchiliklarni o‘rganish, ­muammoni bartaraf etish ­orqali fuqarolarning ishonchini qozonish maqsadida Xalq qabulxonasi tomonidan 1 539 marta sayyor qabul ­o‘tkazildi.

Saminjon HUSANOV