Aholi murojaatlarini o‘rganish, ularning muammolariga joyida yechim topish maqsadida Buxoro viloyati 4-sektor ishchi guruhi tomonidan Shofirkon_tumanidagi Alisher Navoiy mahallasi fuqarolari bilan sayyor qabul o‘tkazildi.

Qabulda viloyat soliq boshqarmasi boshlig‘i o‘rinbosari S.Fayziyev, tuman xalq qabulxonasi, mahalla yettiligi hamda tegishli tashkilot vakillari qatnashdi. Uchrashuvda 15 ga yaqin murojaat tushdi va ularning 10 ga yaqini shu yerning o‘zida hal etildi. 

Xususan, “Ayollar” hamda “Yoshlar daftari”ga kiritilgan 4 nafar ishsiz xotin-qizga tikuv mashinasi, 4 nafar yoshga doimiy ish bilan band bo‘lishi uchun ustachilik asbob-uskunalari, 1 nafar fuqaroga mato-kultivator hamda 1 nafar fuqaroga esa yuk ko‘taradigan mototsikl imtiyozli kredit asosida berildi. 

– Yoshligimdan tikuvchilikka qiziqaman, – deydi Marjona Alloqulova. – Hunarni o‘rganib, uyda tikish uchun ishlarni boshladim. Ammo, tikuv mashinam yo‘qligi sabab muammolar bor edi. Sayyor qabulda menga sektor tomonidan tikuv mashinasi berildi. Endi bu mashina orqali buyurtmalarni qabul qilib, qishloqdoshlarimga ko‘mak beraman va oilam daromadiga yordamlashaman. 

Olim Sharipov qo‘lida hunari bor. Ilgari migrant bo‘lib chet davlatda ishlab kelgan. Hozirda ishsiz. Sayyor qabulda u sektor ishchi guruhidan qurilishda kerak bo‘ladigan asbob-uskunalarni imtiyozli kredit asosida olib berishda yordam so‘radi. Sektor ishchi guruhi murojaatni shu yerning o‘zida hal etib unga asbob-uskunalar berildi. 

Murojaatlarning ayrimlari qo‘shimcha o‘rganish talab etilganligi bois qonuniy tartibda ijobiy hal etish bo‘yicha mas’ullarga topshiriqlar berildi.