Namangan viloyatida hududlarni obod qilish, aholi uchun munosib turmush sharoitini yaratishga qaratilgan tizimli ishlar bajarilmoqda.

Xususan, To‘raqo‘rg‘on tumanida Prezidentimizning 2022 yil 25 oktyabrdagi “2022-2023 yillarda mahallalar infratuzilmasini yanada yaxshilash bo‘yicha qo‘shimcha chora-tadbirlar to‘g‘risida”gi qarori ijrosi doirasida birgina ichki yo‘llarni yaxshilash uchun 12 milliard so‘m ajratilib, 15 ta mahallaning ichki ko‘chalari zamonaviy holga keltirildi.  

Ushbu ishlar Vazirlar Mahkamasining 2023 yil 13 iyundagi tegishli farmoyishiga asosan davom ettirilib, 7 ta MFYda 8,4 kilometr ichki yo‘llarni asfaltlash uchun 4,3 milliard so‘m mablag‘ ajratildi. Hozirda Porosmon, Sharq, Kujron mahallalarida yo‘lsozlik ishlari yakunlandi.  

Ayni paytda pudratchi tashkilot “401-XMKK” MCHJ tomonidan Hamid Olimjon mahallasidagi ichki ko‘chalarni asfaltlash ishlari olib borilmoqda.  

- Ko‘chalarimizga 45 yil oldin asfalt qoplangan, - deydi mehnat faxriysi Rahmonberdi Rahimov. - Ta’mirtalab holga kelib qolgan yo‘lda harakatlanish aholiga ancha noqulayliklar tug‘dirayotgan edi. Shukrki, davlatimizning mahallalarni obod qilishga qaratayotgan e’tibori samarasi, yo‘llar sozlanib, ravon bo‘lmoqda.