Buxoro viloyatida tibbiy yordamga muhtoj xotin-qizlar bilan ishlash samaradorligini va ularga ko‘rsatiladigan tibbiy xizmat sifatini yanada oshirish bo‘yicha “Yo‘l xarita”si ishlab chiqilgan.

– Viloyatda “Ayollar daftari” ning 2-bosqichida ro‘yxatga kiritilgan tibbiy yordamga muhtoj 6 ming 538 nafar xotin-qizlar to‘liq tibbiy ko‘rikdan o‘tkazilgan, – deydi viloyat hokimining xotin-qizlar masalalari bo‘yicha maslahatchisi, Mahalla va oilani qo‘llab-quvvatlash boshqarmasi boshlig‘ining birinchi o‘rinbosari Feruza Ibragimova. – Shundan 2 ming 199 nafari dori-darmon bilan ta’minlangan. 175 nafariga tibbiyot maskanlarda davolanishi uchun maxsus orderlar berilgan. 2 ming nafardan ziyodi ambulator davolangan. 16 nafarida jarrohlik amaliyoti o‘tkazilgan. Buning uchun jami 295 million 18 ming so‘mdan ziyod mablag‘ ajratilgan. 311 nafar xotiq-qizlarga shu kabi boshqa turdagi tibbiy xizmatlar ko‘rsatilgan.

Ayni kunda “Ayollar daftari” ning 3-bosqichi ro‘yxatidagi og‘ir ijtimoiy ahvolga tushib qolgan xotin-qizlarga munosib tibbiy yordam ko‘rsatish, ularning mavjud muammolarini ijobiy hal etish, erta tug‘ruq va onalik-bolalikni himoya qilishga doir masalalar yuzasidan keng ko‘lamli ishlar amalga oshirilmoqda.